پٹنہ، 26 جون (ہ س)۔ بہار اسمبلی انتخابات سے پہلے وزیر اعلیٰ مسلسل عوامی تشویش سے متعلق فیصلے لے رہے ہیں۔ سماجی تحفظ پنشن میں تین گنا اضافے کے بعد وزیر اعلیٰ نے آج ریاست کے عوام کو ایک اور تحفہ دیا ہے۔ حکومت نے تہواروں کے دوران گھر دیگر ریاستوں سے واپس آنے والے بہار کے لوگوں کی سہولت کے لیے 299 بسیں چلانے کا فیصلہ کیا ہے۔
نتیش کمار نے جمعرات کے روز انسٹاگرام پر پوسٹ کرکے یہ جانکاری دی۔ وزیر اعلیٰ نے اپنی پوسٹ میں لکھا ہے کہ "بہار کے لوگ مختلف تہواروں بالخصوص چھٹھ، ہولی، دیوالی اور درگا پوجا کے موقع پر دہلی، اتر پردیش، پنجاب، ہریانہ اور مغربی بنگال سے بڑی تعداد میں گھر آتے ہیں، تہواروں کے موقع پر لوگوں کو بہار آنے میں کافی مشکلات کا سامنا کرنا پڑتا ہے۔ ہماری حکومت مسلسل کوششیں کر رہی ہے کہ بہار کے لوگوں کو سہولت فراہم کرنے کے لیے ان کی آمد و رفت کو آسان بنایا جا سکے۔ اس سلسلے میں ریاستی حکومت بہار سے جڑے بین ریاستی راستوں پر 299 اے سی اور نان اے سی بسیں چلانے جا رہی ہے۔“
وزیر اعلیٰ نے لکھا کہ ریاستی حکومت 75 ایئر کنڈیشنڈ اور 74 ڈیلکس بسوں کی خریداری پر 105.82 کروڑ روپے خرچ کرے گی۔ ساتھ ہی 150 اضافی اے سی بسیں بھی پبلک پرائیویٹ پارٹنرشپ کے تحت چلائی جائیں گی۔ ریاستی حکومت مرکزی حکومت سے تہواروں بالخصوص چھٹھ پوجا، ہولی، دیوالی اور درگا پوجا کے موقع پر مزید خصوصی ٹرینیں چلانے کی درخواست بھی کرے گی۔ اس سے اب لوگوں کو تہواروں کے دوران بہار آنے میں سہولت ملے گی اور وہ آسانی سے اپنے گھروں تک پہنچ سکیں گے۔ اس فیصلے کو انتخابات سے قبل ایک ایکشن پلان کے طور پر دیکھا جا رہا ہے۔ نتیش حکومت نے حالیہ مہینوں میں تعلیم، صحت، سڑک اور ٹرانسپورٹ کے میدان میں کئی اعلانات کیے ہیں۔ اب تہواروں کے موسم کے پیش نظر اس قدم کو مہاجر بہاری ووٹروں کو راغب کرنے کی حکمت عملی کے طور پر بھی دیکھا جا رہا ہے۔
دیگر ریاستوں میں مقیم بہار کے لوگوں کے لیے نتیش حکومت تہواروں کے دوران چلائے گی 299 بسیں
