لکھنؤ۔ 10؍ اکتوبر۔ یوگی حکومت نے پورے اتر پردیش میں 3000 پنک بوتھ قائم کرنے اور سیف سٹی پروجیکٹ کے تحت تمام 10417 خواتین کو پنک اسکوٹر فراہم کرنے کی کوششیں تیز کردی ہیں۔ ویمن اینڈ چائلڈ پروٹیکشن آرگنائزیشن کی جانب سے اس سلسلے میں ایک تجویز تیار کرکے حکومت کو پیش کی گئی ہے اور امکان ہے کہ ریاستی حکومت کی منظوری کے بعد جلد ہی اس پر عمل درآمد کیا جائے گا۔پروجیکٹ کے پہلے مرحلے میں ریاست کے 9 شہروں میں پھیلے 20 مذہبی مقامات پر پنک بوتھس بنانے کا فیصلہ کیا گیا ہے، جبکہ 17 میونسپل کارپوریشنوں میں 1100 خواتین بیٹ کانسٹیبلوں کو الیکٹرک ٹو وہیلر اسکوٹر فراہم کرنے کی ہدایات دی گئی ہیں۔ اس مرحلے کے لیے پنک بوتھس کی تعمیر اور الیکٹرک ٹو وہیل اسکوٹر کی فراہمی کے لیے تین ماہ کی ٹائم لائن دی گئی ہے۔یہاں یہ بات قابل ذکر ہے کہ سیف سٹی پروجیکٹ اتر پردیش میں تین مرحلوں میں مکمل ہونا ہے۔ پہلے مرحلے میں گوتم بدھ نگر کے ساتھ 17 میونسپل کارپوریشن شامل ہیں۔ دوسرے مرحلے میں 57 ضلعی ہیڈکوارٹرز، اور میونسپل کارپوریشنوں کو شامل کیا جائے گا، اور تیسرے مرحلے میں 143 میونسپل کارپوریشنوں کو سیف سٹی پروجیکٹ سے منسلک کیا جائے گا۔ بی پی ویمن اینڈ چائلڈ سیفٹی پروٹیکشن کے اے ڈی جی جوگ دند نے بتایا کہ سیف سٹی پروجیکٹ کے پہلے مرحلے میں ریاست کے 9 شہروں جن میں وارانسی، ایودھیا، پریاگ راج، مرزا پور، متھرا، گورکھپور،آگرہ، بلرام پور، اور چترکوٹ شامل ہیں، میں 20 مذہبی مقامات پر گلابی بوتھ بنائے جائیں گے۔
یوپی حکومت 1100 خواتین بیٹ کانسٹیبلوں کو گلابی اسکوٹر فراہم کرے گی
