مولانا قاسم نوری کی صدارت میں جمعیۃ علماء صوبہ دہلی کی مجلسِ عاملہ کا اہم اجلاس

ناظم عمومی جمعیۃ علماء ہند مولانا حکیم الدین قاسمی کا خطاب، نئے ٹرم کی پہلی مجلس عاملہ میں ناظم اعلی ٰ کے عہدے پر مولانا آفتا ب صدیقی کی نامزدگی اور تنظیم کو مضبوط کرنے پرزور
نئی دہلی، 13 جنوری 2025ء:جمعیۃ علماء صوبۂ دہلی کی مجلسِ عاملہ کا ایک اہم اجلاس نو منتخب صدر مولانا محمد قاسم نوری قاسمی، صدر جمعیۃ علماء صوبۂ دہلی،کے زیرِ صدارت منعقد ہوا۔ اجلاس کا آغاز قاری عبدالسمیع، جنرل سکریٹری دینی تعلیمی بورڈ صوبۂ دہلی، کی تلاوتِ کلامِ پاک اور نعتِ رسولِ مقبول ﷺ سے ہوا۔ اجلاس میں مہمانِ خصوصی کے طور پر جمعیۃ علماء ہند کے ناظم عمومی مولانا محمد حکیم الدین قاسمی شریک ہوئے۔
مجلس عاملہ میں متعدد اہم امور پر تفصیلی غور و خوض کیا گیا، جن میں تنظیمی ڈھانچے کو مضبوط بنانے اور صوبۂ دہلی میں جمعیۃ کی سرگرمیوں کو مؤثر طور پر آگے بڑھانے کے طریقے شامل تھے۔ اجلاس میں ایک اہم ایجنڈا ناظم اعلی کی نامزدگی تھی، چنانچہ حسب تجویز اتفاقِ رائے سے مولانا محمد آفتاب صدیقی ساکن بوانہ دہلی کو رواں ٹرم کے لیے ناظمِ اعلیٰ نامزد کیا گیا، جبکہ قاری احرارالحق جوہر قاسمی کو ایڈیشنل جنرل سکریٹری بنایا گیا۔
اپنے خصوصی خطاب میں ناظمِ عمومی جمعیۃ علماء ہند مولانا محمد حکیم الدین قاسمی نے نئے ٹرم کے لیے منتخب ہونے والے تمام ذمہ داران کو دل کی گہرائیوں سے مبارکباد پیش کی۔انہوں نے کہا کہ جمعیۃ علماء ہند سے ہماری وابستگی محض ایک تنظیمی رشتہ نہیں بلکہ ایک مقدس امانت ہے۔ اللہ تعالیٰ نے لاکھوں مسلمانوں میں سے چند افراد کو اس خدمت کے لیے منتخب فرمایا ہے۔ ایمان کی حفاظت، دینی تشخص کا تحفظ اور ملت کی فکری و تعلیمی تربیت جمعیۃ کا بنیادی مشن ہے، جسے مدارس، مکاتب اور دینی اداروں کے ذریعے آگے بڑھایا جا رہا ہے۔ ہمارا اصل میدانِ عمل خدمت ہے—خدمتِ دین، خدمتِ ملت اور خدمتِ انسانیت۔ اس راہ میں سب سے اہم چیز حسنِ اخلاق اور زبان کی حفاظت ہے۔ رسول اللہ ﷺ نے فرمایا کہ اچھے اخلاق والا انسان نفلی عبادت گزاروں پر بھی فضیلت لے جاتا ہے۔ حضرت معاذ بن جبلؓ کو یمن روانہ کرتے وقت نبی کریم ﷺ نے خاص طور پر زبان کی حفاظت کی وصیت فرمائی۔ جمعیۃ کی تاریخ قربانی، استقامت اور بے لوث خدمت سے عبارت ہے۔ ہمارے اکابر نے ذاتی غموں کو بھی جماعت کے کام پر قربان کیا۔ یہی وہ روح ہے جس نے اس ادارے کو سو برس سے زائد عرصے تک زندہ اور متحرک رکھا ہے۔ یاد رکھیے! عبادت سے جنت ملتی ہے، مگر خدمت سے خدا ملتا ہے۔ حضرت موسیٰؑ کی زندگی ہمیں یہی سبق دیتی ہے کہ خدمت کے جذبے سے اللہ کی قربت حاصل ہوتی ہے۔ اللہ تعالیٰ ہم سب کو اخلاص، استقامت اور خدمتِ خلق کے جذبے کے ساتھ جمعیۃ کے مشن کو آگے بڑھانے کی توفیق عطا فرمائے۔
مجلس عاملہ کے اس جلاس میں مولانا محمد قاسم نوری قاسمی (صدر صوبۂ دہلی)، قاری عبدالغفار (نائب صدر)، مولانا مفتی خلیل قاسمی (نائب صدر)، مولانا اخلاق قاسمی (نائب صدر)، قاری محمد عارف (نائب صدر)، قاری محمد سلیم ( خازن) مولانا ساجد نظام الدین دہلوی، مولانا آفتاب صدیقی، قاری ارشاد بوانہ، قاری عبدالسّمیع، مفتی شفاعت قاسمی، مولانا حسین شاستری پارک، قاری احرارالحق جوہر، مولانا ضیاء اللہ قاسمی، مفتی اشرف قاسمی، مفتی نثار احمد شریک تھے۔اجلاس کا اختتام مولانا قاری عبدالغفار صاحب کی دعا پر ہوا۔