دہلی کے وزیر اعلی اروند کیجریوال نے تمام اپوزیشن جماعتوں سے جمہوریت کو بچانے کے لیے متحد ہونے کی اپیل کی اور اتوار کو کہا کہ وزیر اعظم نریندر مودی نے ملک کا بیڑہ غرق کر دیا ہے مسٹر کیجریوال نے مرکز کے آرڈیننس کے خلاف یہاں عام آدمی پارٹی (آپ) کی ریلی میں مسٹر مودی پر سخت تنقید کرتے ہوئے کہا ’’پہلی بار ایسا وزیر اعظم آیا ہے جو سپریم کورٹ کے حکم اور آئین کو نہیں مانتا۔‘‘ انہوں نے تمام اپوزیشن جماعتوں سے اپیل کی کہ وہ اس آرڈیننس کی مخالفت کریں۔ انہوں نے کہا کہ 140 کروڑ عوام مل کر اس آرڈیننس کی مخالفت کریں گے اور جمہوریت اور ملک کو بچائیں گے۔ انہوں نے کہا کہ وہ پورے ملک کو بتانا چاہتے ہیں کہ لوگ یہ نہ سمجھیں کہ یہ صرف دہلی کے ساتھ ہوا ہے۔ دہلی جیسا آرڈیننس دوسری ریاستوں کے لیے بھی لایا جا سکتا ہے، اس لیے اب سبھی کو اسے روکنا ہوگا۔
انہوں نے کہا کہ مرکزی حکومت نے آرڈیننس لا کر سپریم کورٹ کے حکم کو مسترد کر دیا۔ آرڈیننس میں کہا گیا ہے کہ دہلی کے لوگ اب سپریم نہیں ہیں۔ وزیر اعظم نے آئین کے پرخچے اڑا دیئے۔ وزیر اعلیٰ نے کہا’’بی جے پی والے مجھے روزانہ گالیاں دیتے ہیں لیکن اس سے مجھے کوئی فرق نہیں پڑتا لیکن میں دہلی کی توہین برداشت نہیں کر سکتا۔ آرڈیننس کو مسترد کراکر رہوں گا۔
انہوں نے کہا کہ میں ملک بھر میں گیا اور تمام پارٹیوں سے ملاقات کی جس سے مجھے پتہ چلا کہ سبھی پارٹیاں دہلی کے لوگوں کے ساتھ ہیں۔ ایک سو چالیس کروڑ عوام مل کر آرڈیننس کی مخالفت کریں گے اور جمہوریت کو بچائیں گے۔