شاہی امام مسجد فتحپوری دہلی مفکر ملت مولانا ڈاکٹر مفتی محمد مکرم احمد صاحب نے آج نماز جمعہ سے قبل خطاب میں مسلمانوں سے اپیل کی کہ عبادتوں کے ساتھ ملّی کاموں میں تعاون زیادہ سے زیادہ کریں۔
انہوں نے کہا صہیونی بربریت اور جارحیت کو (100) سودن سے بھی زیادہ ہوچکے ہیں، پچاس ہزار کے قریب بچے عورتیں اور نہتے شہری ہلاک ہوچکے ہیں اور کچھ لاپتہ ہوچکے ہیں، فلسطینی لاکھوں عوام دانے دانے کو ترس رہے ہیں، بھوک سے مر رہے ہیں، دواؤں کی قلت کی وجہ سے زخمی اور بیمار بھی ہلاک ہو رہے ہیں۔ مظلوم عوام کی حالت زار کو الفاظ میں بیان کرنا ممکن نہیں ہے فوری امداد بیحد ضروری ہے۔ اقوام متحدہ نے بھی بار بار شدید تشویش کا اظہار کرتے ہوئے راحت کاری کے کاموں کو شروع کرنے کی اپیل کی ہے۔ عالمی برادری اور پڑوسی عرب ملکوں سے نیز صہیونی حکومت سے ہماری پُرزور اپیل ہے کہ لاکھوں بے گھر عوام کے لیے راحت رسانی کے کاموں کو جلد از جلد شروع کیا جائے، ہسپتالوں کو فعال بنایا جائے، بیماروں کے معقول علاج کا بندوبست کیا جائے۔ امریکہ اور یوروپی ممالک سے ہماری اپیل ہے کہ ضدی اسرائیلی وزیر اعظم کا ہرگز ساتھ نہ دیا جائے اُس کی ضد نے پورے خطہ کو بدامنی میں مبتلا کردیا ہے فوری جنگ بندی ہونی چاہئے۔
مفتی مکرم نے کہا کہ شاہی عیدگاہ متھرا کے سروے کے حکم پر سپریم کورٹ نے روک لگاکر انصاف کا بول بالا کیا ہے۔ سپریم کورٹ کی بینچ نے مسجد انتظامیہ کمیٹی کے اعتراض کو تسلیم کرتے ہوئے شاہی عیدگاہ مسجد کے سروے کے لیے کورٹ کمشنرکی تقرری کے لیے دائر درخواست پر سخت تحفظات کا اظہار کیا۔ایک دوسرے معاملہ میں اشتعال انگیزی پر سخت تیور دکھاتے ہوئے سپریم کورٹ نے اس ہفتہ میں منعقد ہونے والی ہندو تنظیم اور ٹی راجہ سنگھ کی ریلیوں کے لیے متعلقہ حکام کو مناسب اقدامات کرنے، ریکارڈنگ کرانے اور سی سی ٹی وی کیمرے نصب کرکے مکمل احتیاطی تدابیر اختیار کرنے کی ہدایت دی تاکہ اگر کوئی ناخوشگوار واقعہ پیش آئے تو مجرموں کی نشاندہی کی جاسکے۔ مفتی مکرم نے ملک میں بڑھتی ہوئی نفرت اور فرقہ پرستی پر شدید تشویش کا اظہار کیا۔
۷۱ جنوری ۴۲۰۲صبح ۴ بجے کے قریب پی سی آر پر گمنام کال کرکے مسجد فتحپوری کو بدنام کرنے کی سازش کرنے والے پر انہوں نے حکومت سے سخت کارروائی کا مطالبہ کیا،یہ عمل ناقابل برداشت ہے۔
متھرا کی شاہی عیدگاہ کے سروے پر سپریم کورٹ کے فیصلہ کا خیرمقدم
